ხელის ჰიგიენა არის ერთ-ერთი ყველაზე მნიშვნელოვანი და ეფექტური ზომა სამედიცინო დაწესებულებებში ინფექციების პრევენციისა და კონტროლისთვის.
საპნით და სუფთა წყლით ხელების დაბანისას შესაძლებელია კანიდან მუშაობის პროცესში დაგროვილი მიკროორგანიზმების მოცილება, რაც აუცილებელია შემდეგ შემთხვევებში:
- რეზისტენტული პათოგენებით კოლონიზებული პაციენტების მომსახურების შემდეგ
- ინვაზიური, სუფთა, სტერილური მანიპულაციების წინ
- ახალშობილებთან და იმუნოდეფიციტის მქონე პაციენტებთან კონტაქტის წინ და შემდეგ
- როდესაც ხელები ვიზუალურად დაბინძურებულია – მაგ. ქუჩიდან შემოსვლისას, საპირფარეშოს შემდეგ
- საკვების მიღების წინ და შემდეგ
- როდესაც არ არის ხელმისაწვდომი ანტისეპტიკური ხსნარი
ხელის გასუფთავების სწრაფი ალტერნატივაა ალკოჰოლის შემცველი ხსნარი, რომელიც თითქმის სრულად ანადგურებს მიკროორგანიზმებს და მარტივად გამოიყენება კლინიკურ გარემოში.
განსაზღვრულია 5 მომენტი, როდესაც ხელის ჰიგიენა აუცილებლად უნდა შესრულდეს:
პაციენტთან კონტაქტამდე
ასეპტიკური, “სუფთა” პროცედურის წინ (მაგალითად, ინტრავენურ კათეტერიზაციამდე)
სხეულის სითხეებთან კონტაქტის შემდეგ (მაგალითად, სისხლი ან შარდი)
პაციენტთან კონტაქტის შემდეგ
პაციენტის გარემოსთან (მაგალითად, საწოლი, სამედიცინო ინსტრუმენტები) კონტაქტის შემდეგ
ხელის ჰიგიენისას ყურადღება უნდა მიექცეს ტექნიკის დაცვას და ხშირად გამოტოვებულ ადგილებს, მაგ., თითების წვერებს, თითებს შორის სივრცეს, ფრჩხილქვეშა ზონებს. როგორც ხელების დაბანა, ისე სპირტხსნარით დამუშავება უნდა მოხდეს რეკომენდაციების მკაცრი დაცვით, რათა ყველა ადგილი საგულდაგულოდ დასუფთავდეს.
სამედიცინო დაწესებულების სტრატეგიულ ადგილებში (მაგ., პალატებში, საპროცედუროებსა და კლინიკის შესასვლელებში) ხელმისაწვდომი უნდა იყოს როგორც საპონი და წყალი, ისე ალკოჰოლშემცველი საშუალებები. ხელის ჰიგიენა არა მარტო პროფესიული პასუხისმგებლობაა, არამედ გადამწყვეტი ფაქტორია პაციენტთა უსაფრთხოებისა და სამედიცინო მომსახურების ხარისხის ამაღლებისთვის, ხელის ჰიგიენის კარგ პრაქტიკას შეუძლია სამედიცინო მომსახურებასთან ასოცირებული ინფექციების 70%-ით შეამცირება.
დამატებითი ინფორმაცია იხილეთ აქ https://www.who.int/teams/integrated-health-services/infection-prevention-control/hand-hygiene
