ყოველწლიურად, 18-24 ნოემბერს ანტიმიკრობული რეზისტენტობის შესახებ ცნობიერების ამაღლების მსოფლიო კვირეული აღინიშნება. ღონისძიების წლევანდელი სლოგანია „იმოქმედეთ ახლა: დაიცავით ჩვენი აწმყო, უზრუნველყავით ჩვენი მომავალი“.
ჯანმრთელობის მსოფლიო ორგანიზაციამ ანტიმიკრობული რეზისტენტობა (ამრ)
გლობალური ჯანმრთელობის 10 მთავარ საფრთხეს შორის გამოაცხადა. ანტიბიოტიკებმა და სხვა ანტიმიკრობულმა საშუალებებმა ბოლო 100 წლის განმავლობაში მილიონობით სიცოცხლე გადაარჩინეს. სამწუხაროდ, ამ მედიკამენტების ბოროტად გამოყენება და ჭარბი მოხმარება იწვევს რეზისტენტობის განვითარებას, რის გამოც ზოგიერთი ინფექცია აღარ რეაგირებს ანტიმიკრობულ პრეპარატებზე. ამ მოვლენამ შეიძლება უზარმაზარი ზიანი მიაყენოს ადამიანის სიცოცხლეს და საარსებო წყაროს 21-ე საუკუნეში, თუ ყველა ერთად არ მიიღებს სასწრაფო ზომებს ანტიმიკრობული საშუალებების შესანარჩუნებლად.
ადამიანს შეიძლება განუვითარდეს რეზისტენტული მიკროორგანიზმით გამოწვეული ინფექცია ნებისმიერ ასაკში, მსოფლიოს ნებისმიერ წერტილში. მრავალმა ფაქტორმა, მათ შორის ადამიანებში, მეცხოველეობასა და სოფლის მეურნეობაში მედიკამენტების ჭარბმა და არასწორმა გამოყენებამ, ასევე სუფთა წყალზე, სანიტარიასა და ჰიგიენაზე არასაკმარისმა წვდომამ დააჩქარა ანტიმიკრობული რეზისტენტობის საფრთხის ზრდა მთელ მსოფლიოში. მიუხედავად იმისა, რომ ყოველწლიურად მილიონობით ადამიანი ავადდება ანტიმიკრობული პრეპარატების მიმართ რეზისტენტული ინფექციებით, ცოტამ თუ იცის
ამ საფრთხის შესახებ.
დამატებითი ინფორმაციისთვის ეწვიეთ ჯანმო-ს WAAW კამპანიის გვერდს.
