2025 წლის 24 ნოემბერს, თბილისის სახელმწიფო სამედიცინო უნივერსიტეტის მიკრობიოლოგიის დეპარტამენტის ორგანიზებით და ადგილობრივი და საერთაშორისო პარტნიორების ჩართულობით, ანტიმიკრობული რეზისტენტობის შესახებ ცნობადობის ამაღლების კვირეულის (18-24 ნოემბერი) ფარგლებში, ტარდება საერთაშორისო კონფერენცია თემაზე: „ თანამედროვე გამოწვევები და ჯანდაცვის გლობალური საკითხები მიკრობიოლოგიაში აღმოსავლეთ ევროპისა და კავკასიის რეგიონზე ფოკუსირებით “.
კონფერენციის ფარგლებში განხილული იქნება ისეთი აქტუალური საკითხები, როგორიცაა ანტიმიკრობული რეზისტენტობა, პანდემიების პრევენცია და მზადყოფნა, ბაქტერიოფაგები – როგორც ანტიბიოტიკების ალტერნატივა და მიკრობიოლოგიის სხვა თანამედროვე გამოწვევები.
კონფერენციის ფარგლებში მოხსენებას წარადგენენ: ჯანდაცვის მსოფლიო ორგანიზაციის რეგიონალური ოფისის, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს და დაავადებათა კონტროლისა და საზოგადოებრივი ჯანმრთელობის ეროვნული ცენტრის, უოლტერ რიდის სახელობის სამხედრო სამეცნიერო-კვლევითი ინსტიტუტის წარმომადგენლები, ქართველი და უცხოელი მეცნიერები სხვადასხვა ქვეყნიდან. კონფერენციის საპატიო სტუმარი იქნება ევროპის კლინიკური მიკრობიოლოგიისა და ინფექციური დაავადებების ასოციაციის პრეზიდენტი რობერტ ლეო სკოვი, რომელიც ისაუბრებს ანტიმიკრობული რეზისტენტონტობის, როგორც გლობალური გამოწვევის, შესახებ.
კონფერენცია ეძღვნება მიკრობიოლოგიის სფეროს გამორჩეული მოღვაწის,პროფესორ თამაზ კერესელიძის 100 წლის იუბილეს.
კონფერენციის საორგანიზაციო კომიტეტი:
- თსსუ მიკრობიოლოგიის დეპარტამენტი
- ლ. საყვარელიძის სახელობის დაავადებათა კონტროლის და საზოგადოებრივი ჯანმრთელობის ეროვნული ცენტრი
- საქართველოს ზოგადი და გამოყენებითი მიკრობიოლოგიის ასოციაცია
- საქართველოს ეპიდემიოლოგთა და ინფექციის კონტროლის სპეციალისტთა ასოციაცია
- გიორგი ელიავას სახელობის ბაქტერიოფაგიის,მიკრობიოლოგიის და ვირუსოლოგიის სამეცნიერო კვლევითი ინსტიტუტი
- ი.თარხნიშვილის სახელობის სტუდენტური სამეცნიერო საზოგადოება